Umugezi winjiye mu Rwibutso rwa Nyundo mu Karere ka Rubavu

Patrick KAMBALE

Nk’uko byatangajwe n’umwe mu barokokeye muri iyo seminari yo ku Nyundo ushinzwe kwita kuri urwo rwibutso Mme Mukarusagara Rose, ngo babimenye imvura ihise ubwo bajyagayo kureba ko haba hari icyangiritse, ni uko basanga amazi yinjiye mu byumba bishyinguyemo inzirakarengane, aninjira mu masanduku bashyinguyemo imibiri yazo.

Ngo akibimenya, yahise abimenyesha ukuriye IBUKA mu Murenge wa Nyundo, ni uko babimenyesha ubuyobozi bubegereye nabo babimeneysha Akarere, meza n’abandi baturage batuye muri uwo Murenge batangira igikorwa cyo gushakira inzira amazi yo muri uwo mugezi  wa Nyakagezi wari watijwe imbaraga na Nsebeya inyura iruhande rw’Urwibutso mu ntera ijya kungana na metero 35, nayo yari yarengeye imirima y’abaturage iri hafi y’urwo rwibutso.

 Mu Kiganiro n’Umuyobozi wungirije w’Akarere ka Rubavu ushinzwe imibereho myiza Mme Nyirasafari Rusine Rachelle yatangaje ko bakimenya icyo gikorwa bihutiye kwifatanya nabo kugirango barebe uko basana ibyangiritse birimo amasanduku yari yangijwe n’amazi. Ikindi bihutiye gukora nk’uko byagaragaraga ko ari umugezi wari wuzuye amazi akarenga, basabye ubuyobozi bw’Umurenge wa Nyundo kujya gusibura aho bigaragara ko hari hasibamye amazi akinjira mu rwibutso. 

Sibyo gusa bakoze, ubwo  twasuraga urwo rwibutso bari bategereje umwubatsi uzobereye mu kubaka inzibutso, kugirango aze arebe uko byakemurwa cyane ko atari ubwa mbere amazi yinjira muri urwo rwibutso kuko no muwi 2010 byigeze kuba ubwo Nsebeya yuzuraga. 

Icyo gihe nabwo hategetswe ko hazanwa umufundi w’umuhanga ku buryo bitazongera kuba.  Ariko nk’uko bitangazwa na Perezida wa Ibuka y’Umurenge wa Nyundo Bwana Ndamyumugabe Théogène, ngo ibyo uwo muhanga yakoze ni ugusiga irangi no kubaka umureko w’amazi umwe w’ahagana mu rwibutso hagati, ariko ntiyagira icyo acyemura ku kibazo cy’amazi yuzura akajya mu rwibutso.

 Ngo iyo babajije uko byagenze, babasubiza ko uwo mwubatsi yahawe amafaranga macye ahwanye n’ibyo yakoze.

Iyo witegereje usanga urwo rwibutso ruri ahantu hasi kandi iruhande rw’umugezi wa Nsebeya, ku buryo iyo wuzuye nta hantu amaze ashobora gutembera handi. Ikindi ni uko iyo witegereje imyubakire y’urwo rwibutso usanga uretse no kuba rwubatse mu kabande, n’imibiri y’inzirakarengane ihashyinguwe yashyizwe muri kave y’urwo rwibutso. Ku buryo amazi iyo abaye menshi aruhukira ahashyinguwe iyo mibiri. Kugeza ubu kandi hari n’igice cy’Urwibutso ahatwikirije beto, utamenya niba amazi yaragezemo cyangwa atarageramo.

Nk’uko byatangajwe n’uwo mwubatsi w’inzobere mu kubaka inzibutso wari utegerejwe, ngo kugirango ibyo bitazongera kuba, ni uko hakubakwa inkuta ndende mu bujya kuzimu, kugirango zibuze amazi kuzamukira mu rwibutso. Ngo ibyo bizakorwa badashenye inkuta zari zihari, ko ahubwo zizubakwa inyuma y’izariho.

Urwibutso rwa Nyundo ni rumwe mu nzibutso eshatu z’Akarere ka Rubavu, ruherereye inyuma ya Seminari yo ku Nyundo. Rushyinguwemo inzirakarengane zigera kuri 851, zirimo abagogwe baguye kuri Cathédrale  ya Nyundo, izaguye muri iyo Seminari ya Nyundo n’izindi nzirakarengane imibiri yazo yagiye ikurwa hirya no hino ishyingurwa muri urwo rwibutso.